博客 / 馬頭涌

2015-08-14


消委會又點名七間以極惡劣銷售手法經營的藥房,咁樣點名法對打擊呢啲黑藥房有無用?可以講效果係零。
對於一名遊客來講,嚟香港之前會唔會花大量時間搜索黑藥房資料,就算有心水清遊客發現消委會黑店名單,但兩日後,藥房已經改名,[名單]名存實亡,到遊客抵港,招牌不同,經營手法照舊,只要你唔小心行入去,就一定中招,騙唔到你,仲有恐嚇。
已經唔記得呢啲黑藥房由幾時開始,印象中在2003年沙士之後,內地開放自由行,藥房騙案就經常聽聞,而且黑藥房越來越多,總之在遊客區油尖旺丶銅鑼灣必定有一間在你左右。消委會話今年頭七個月接到127宗投訴,總金額150萬,很懷疑呢嗰數字是否反映事實。怕事怕麻煩嘅遊客,無報案無投訴,當做破財擋災一走了之嘅人,十倍百倍都唔止,從另一方面諗,開一間黑店,由舖租、店員、打手、燈油火臘,開支好大,無番咁上下[利潤],點可以維持,而且越開越多。

中國有十幾億人口,只要有百分之一人來香港,已經有千幾萬,呢千幾萬人又有百分一入藥房買嘢,都有十幾萬,入咗去中招機會大咗,有十分一人領嘢,每人損失二萬,總數已有兩億,兩億就有吸引力,亦可以解釋黑藥房趕之不盡,禁之不絕。
十幾年嚟香港政府丶治安單位完全對黑藥房無辨法,其實市面上黑藥房只是一小撮人連鎖式密集經營,香港旅遊業面對中港矛盾衝擊,又加埋呢啲黑藥房劏客,假如我是內地人,我都避之則吉,香港旅遊業仲有運行?



**博客文責自負,不代表堅料網立場**

其他馬頭涌文章

其他博客文章