堅料

2018年11月19

2018-11-09

 由時任財政司司長曾俊華推動,美食車先導計劃已推行了一年半,15部美食車共吸金逾3,300萬元,更有3部成功「上岸」開店,政府9月底更宣布將計劃延長兩年。看似一切美好,但事實上絕大部分經營者不但「回唔到本」,部分更要靠店舖支撐美食車每月數萬元營運開支,完全係「蝕住做」。

雖然營運艱難,但有部分營運者卻說:「唔會斬纜,因為一斬纜就乜都蝕晒。」但也有部分營運者正醞釀大退場,未來兩年只專攻迪士尼、尖沙咀兩個最賺錢場地,以及爭取在大型活動「擺檔」,自求出路。


文:陳明     圖:譚建章


元朗小食店「有得餃」兩年前憑着招牌菜「五色餃子」加入美食車行列。負責人廖震豪說,當時花了近130萬元投資美食車,原本抱有很大期望,但一做之下便發現問題不斷,由場地停泊、配套,到參與大型活動,全部都令人失望。


「無諗過做落有咁多問題,好多經營點都唔得,佢唔應該將我哋定位成旅遊項目。一年有幾多活動可以俾我地去賺錢呢?無嘅時候都要諗下我哋要謀生,點解唔放寬啲?」

美食車先導計劃已推行近一年半。


廖震豪透露,「有得餃」美食車過去一年半的生意額大約220萬,主要來自最賺錢的場地迪士尼樂園、首輪的黃大仙廣場及其他大型活動。但在扣除人工、場租、營業額分成比率、保險、供車、償還貸款等,根本係「無得賺」。


「之前係每個場都要交場租,就算無生意都要交租,頭兩年真係蝕得好慘。好似我哋去金紫荊個場咁計,我喺元朗開車,油錢連隧道都已經600蚊,再加埋場租、人工、食材,夾夾埋埋成三千幾蚊,但我喺嗰度搵得一千蚊都唔夠,到中後期開車仲蝕過唔開車,我寧願開店交租好過。」


斬纜死得唔甘心

廖震豪說,雖然政府今年初推出優化措施,容許美食車不到指定場地擺檔便可豁免租金,但除租金之外,經營美食車的各項開支實在難以承受:「即使架車無郁,每個月都要俾停車場、供車、牌費,大概都要兩萬幾蚊。」他承認,相比經營美食車,搞店舖相對簡單好多:「我唔使俾政府睇我盤數,又唔使交report,又唔使開會聽廢話。」


但話雖如此,廖震豪表明不會「斬纜」:「我哋投資咗咁多錢,你一唔玩呢,架車就蝕晒,當初我哋係要上會供同埋問銀行貸款40萬先可以做到個項目,如果唔做,我哋都要立即還錢,即係我哋死得唔甘心囉。」


他計劃未來兩年只專攻迪士尼樂園及一些較吸引的大型活動:「我哋計過數,一年輪到三次迪士尼,兩年即係有六次啦,希望喺呢六次盡量搵番啲錢返嚟,到時我架車都供緊第四年啦,起碼無咁傷。」

有美食車經營者指過去兩年未能回本,是「蝕住做」。


大集團蝕做當宣傳

而被政府標榜為「成功例子」的「七桌子×樺得園」,去年12月底與「616牛肉火鍋專門店」合作,在紅磡開設實體店。身兼香港美食車聯盟主席的「七桌子×樺得園」負責人林瑞華直言,他的美食車其實仍未回本:「都無錢賺點回本?日常營運收支平衡已經好好喇,我哋已經無諗過回本呢樣嘢。」


但他承認自己算是幸運:「我無做開飲食,係初創人士,我部美食車無錢賺,但係帶俾我知名度,令到我有好多其他合作。616都係睇中我嘅發展及知名度,所以先同我合作。」

迪士尼樂園是美食車最賺錢的營運場地。


林瑞華指出,現時15部美食車,除了他是全無經驗的初創人士外,其餘均是大集團經營或本身做開飲食的業界人士,當中有兩部更已轉手。據他所知,全部美食車均「無錢賺」,大集團經營美食車只係當花錢作流動宣傳,但其他則是要靠店舖真金白銀來補貼。


「其實我哋而家個發展方向已經唔係話可以喺啲經營場地度賺錢,因為除咗迪士尼keep到生意額外,其他點基本上每日只係得千零兩千蚊生意,根本唔夠圍皮。」


他說不少場地並不歡迎美食車進駐,其中最明顯是海洋公園:「佢揀個位出嚟擺到明係hea政府,嗰度根本無人,全部係旅遊巴上落客,唔會有時間停留。」其次是迪士尼樂園:「迪士尼最初都好幫手,但愈嚟愈差,而家仲要喺我哋對面開埋個小食亭去搶生意,我覺得呢樣係好無商業道義,我哋幫你做咗開荒牛,你見我哋好賺,就插支旗落嚟。」


林瑞華透露,兩年來曾嘗試爭取不同方式經營,但始終美食車有不少限制,令他們難以競爭。

今年旅發局主辦的「香港龍舟嘉年華」亦有安排美食車進駐。(中新社)


「我哋試過喺旺角家樂商場度擺,但因為我地存貨唔多,又局限咗我哋煮嘅嘢食,根本唔夠嗰啲小食店爭,就算你而家俾我周街擺,我都未必願意落去,因為未必做到好好嘅生意。」


經過返覆研究,他認為參與一些大型活動反而會成為美食車的賺錢出路:「西九文化區、中環海濱搞演唱會,或者邊度有啲活動,總之周圍都好難搵嘢食,或者你入到個活動入面好難出返嚟,反而呢啲就係我哋嘅發展機會。仲有一條出路就係做私人event,呢個係政府到今時今日仲未肯開放。」


美食車:政府三大搵笨項目之一

林瑞華笑言,政府9月底宣布延長美食車先導計劃兩年後,業界流傳一個自我安慰的笑話:「香港有三大搵笨項目,一個係新田購物城,一個係郵輪碼頭,一個係美食車。其實美食車算係最好,起碼有高知名度,社會大眾關注,起碼4個月會輪到去迪士尼賺錢一次,其他兩個係永遠無錢賺喎,大家自我安慰話其實都唔係咁差啫。」

政府將美食車先導計劃定為旅遊項目。


對於未來兩年發展前景,林瑞華透露,有美食車經營者計劃退出:「尤其是愈後加入嗰啲就愈想走,因為佢哋食唔到頭嗰浸,又賺唔到知名度,又賺唔到錢,我估有一、兩架會退出。」他雖不考慮退出,但坦言聯盟內有部分車已傾向「大退場」:「我哋偏向除咗尖沙咀同迪士尼外,其他都唔簽喇,好多都話簽嚟做咩,嗰個位我哋都唔會去。」


對政府延長計劃但全無改變,林瑞華感到失望:「我哋個感覺就係政府由得你哋自生自滅,俾你哋玩多兩年,好好睇睇,兩年後都搞唔掂係你地自己問題,唔關政府事。」


面對業者強烈質疑,旅遊事務署在回覆本刊查詢時回應,由於美食車可在現場煮食且車身龐大,必須保障安全衞生及停泊時不阻塞交通人流,因此美食車只可按牌照規定,在批准的指定地點及活動中營業,如美食車在不對公眾人士開放的私人活動中營運,有關部門無從審核該處所是否適合美食車營運。而署方暫未收到有美食車營運者要求退出計劃或不與場地續約的通知。


相關圖文:

一朝天子一朝臣   美食車孤兒仔無人理


相關新聞

熱門新聞