消息 / 推介 / 名家 / 馬見聞

2017-01-24

星期日冷馬爆到大家頭暈,冷頭熱腳、熱頭冷腳,總之想收場錢都好難,除非食全餐,表面上全餐極浪費注碼,但當日用最熱門的「翩翩」Q餐,走出隻347元W嘅「幸運年年」,條Q有465元,又有錢贏,其他諸如「都市神話」、「紅麗舍」、「盈利駿馬」、「蒙古王」、「行善積福」唔食餐無本事買,事實上這類馬既無往績、晨課又表現平平,早在放棄之列,甚至練馬師都無信心,否則何來1,400元W,一些混亂場面應否以全餐「對付」,睇馬友福至心靈。

猴年最後一戰,先恭祝馬友贏錢過一個肥年。第二場方嘉柏「事必獲利」又用同一招數,勤跑減分落五班即配莫雷拉,是否就係咁明顯,給大眾馬迷去分錢,見仁見智,相信隻馬會好熱,以值博率考慮,寧願搏隻未出頭的「樂家將」,隻馬今季由孫達志轉入霍廐,老孫有幾多料大家心知肚明,所以跑到依家六歲仍未出頭,入咗霍廐重新做功夫,狀態明顯大幅進步,上場搏殺豈料遇上突然神勇嘅「荷蘭風情」,收埋一個月再操過,神態比上次更好,今場韋達超兩磅都騎,唔會無的放矢。

香港人有句諺語「衰家食尾胡」,現時排在榜尾的高伯新算是「衰」,在農曆年尾好應該執番場,全晚五匹馬最有機會是「妙感」,隻馬都係未開齋,但在香港跑咗11次,有7次跑入四名內,少見高廐內準繩馬匹,上周同高班嘅「武術冠軍」拍跳不遑多讓,上場斜跑失機,與實力無關,今場換巴度,此子最近手風順,希望對隻馬有幫助。

第六場「志有運」今場用潘頓,有心去搏命,睇番隻馬今季六次賽事,就只有莫雷拉大師傅可以贏到,上次阿妹騎出閘慢咗,結果第四,換人正常安排,隻馬完全有作戰狀態,不必擔心。

投注WP過關三串四

第二場(9)樂家將

第四場(5)妙感

第六場(1)志友運 

相關新聞

熱門新聞