堅聞

2017年01月25

2017-01-07


(堅訊)2005年的天才表演式歌唱比賽節目《殘酷一叮》,令觀眾見證到香港地臥虎藏龍的實力,但當中14位台主,至今你又記得幾多個?

唯一仍舊活躍於娛圈的是喬寶寶!一個在香港土生土長的印度人!2005年前,他還是高薪厚職的懲教署職員,成為「叮皇」後,為參與成龍電影《寶貝計劃》的演出,毅然辭職全身投入娛樂圈。

今日,他為自己得到比失去更多而感恩,更為自己為南亞裔人士爭光而自豪!


阿爺一代已在香港定居做小生意的喬寶寶,有五兄弟姊妹,排行第四,因參加《殘酷一叮》而加入娛圈,自言要多謝當年做懲教的同事,替他填寫報名表;為免失禮,他特意把原名喬保羅改成喬寶寶,「到時上司或者啲犯見到,我都可以話印度啲鄉里個個差唔多樣」,意想不到是,喬寶寶無心插柳卻贏得「叮皇」寶座,辭職時更遭朋友、同事潑冷水,唯獨只有太太支持他。


為與成龍合作唔做懲教

喬寶寶說,當年他勝出《殘酷一叮》後,轉瞬便有電影《寶貝計劃》的試鏡機會,「過百人試鏡,冇諗過會得,導演陳木勝話要拍兩個月,我心諗:同成龍大哥拍戲,拍成年我都制啦。」

當時已在懲教署工作了16年、為二級懲教助理的喬寶寶,正想向上司請大假,卻適逢世貿會議,全部紀律部隊需取消休假,「同上司申請,佢話天王都要返工,何況我係『叮皇』?佢仲話,我唔撈咪可以放假囉!」卒之,喬寶寶經歷不少冷嘲熱諷後,最後還是決定搏一鋪,辭去高薪厚職,原因是想做「河國榮第二」,「其實好多洋人角色都非河國榮莫屬,反而全職南亞裔演員就冇,如果劇本有南亞裔角色,我自己可以做番之餘,亦都可以請好多喺香港識聽講講甚至乎識寫識睇中文嘅一啲南亞裔人士幫手,咁就可以幫南亞裔人士喺香港搵到條新出路。」


黑妹帶挈登台騷做唔停

喬寶寶拍攝《寶貝計劃》途中,TVB便找他參演處境喜劇《高朋滿座》,戲份由少漸多,煞科戲更以他為主題,「嗰兩三年真係好開心,工作、戲劇排山倒海咁嚟。」不過,喬寶寶最開心的是,入行第二年便獲七、 八十年代紅歌手黑妹(李麗霞)賞識,帶他到世界各地登台搵銀,喬寶寶說:「其實黑妹姐話,如果歌底唔靚唔正,幾乎埋唔到佢身,唯獨是我一個係甩嘴甩Key甩歌詞,黑妹姐真係好錫我,去美國、加拿大、英國、澳洲、馬拉登台都帶埋我去,有時諗番,自己家姐細妹都未必咁錫我,佢好多工作第一時間都推薦我畀啲主辦單位,佢真係對我好好!」


人生低潮期:移民蘇格蘭

一直發展得平步青雲的喬寶寶,其實也有過事業低潮期。那時是2012年,喬寶寶太太申請香港特區護照被拒,他為了照顧兩名在英國蘇格蘭升學的兒子,被逼要暫別娛圈,陪太太到當地坐移民監,「2003年香港沙士,我擔心屋企人有事,就送咗太太、媽咪同個仔去英國,嗰時個仔11歲,太太話係時候要生多個喇,所以細仔喺蘇格蘭出世,但細仔1歲時發覺脊椎有問題,影響行動,喺香港醫咗8年都搵唔到病因,由於佢喺蘇格蘭出世,如果可以喺番當地醫,醫療費用會少好多,只有我陪佢返去坐移民監,太太先可以長居嗰邊照顧兩個仔。」

雖然,原本需要坐三年移民監的喬寶寶,最後一年便可以回流香港,但工作量已經大不如前,「嗰時都好難捱,黑妹姐幫我接好多英國、北愛、美加啲登台騷頂住先。」


代表作《殘酷一叮》改變一生

今年47歲的喬寶寶說,他的代表作11年前已出現,就是《殘酷一叮》!「最難忘都係佢,又戴假髮又剃胸毛唱《至冧情歌》,《殘酷一叮》改變咗我個人生,改變咗香港人對南亞裔嘅觀感!如果當日我同事冇幫我報名,今日我就唔會喺度做緊訪問,或者冇人知道南亞裔原來有個喬寶寶咁得意咁開朗咁活潑咁搞嘢咁開心嘅,我覺得好多嘢都係整定,命裏有時終須有,命裏無時莫強求!」

今日,喬寶寶名利雙收,還擊了當日離開懲教署的每一句冷言冷語,「我都想趁自己仲有斗零知名度嘅時候,可以搵多啲錢幫補家計,不過我都同老婆商量過,諗住2020年全面退出,返屋企抱吓孫,因為我個大仔出年結婚喇,我估我都好快做阿爺,因為佢有我嘅DNA嘛。」

相關新聞

熱門新聞