堅聞

2017年01月25

2017-01-07


(堅訊)「只要有恆心,鐵柱磨成針。」35歲的朱學文,讀書時期成績一般,一年可以被記30多個缺點;中五畢業後做過裝修、跟車等散工,冇份做得長,一旦有機會加入飲食業,即觸發愛烹飪的濃厚興趣,自此邊做邊學,更曾於尖沙咀半島酒店由學徒做起,日做18個鐘冇飯食;16年後的今日,他終於自立門戶,在紅磡開設漢堡包店Burger Factory,成為老闆。

漢堡包店縱然只有百多呎面積,卻因為裝潢特別,食品既有特色又美味,開業三個月以來,客似雲來,「做老闆一定要勤力,唔好怕辛苦,依家最開心係,客人當面讚,好有滿足感。」


自小喜歡下廚的朱學文,中五畢業後不久便有機會到赤柱一間西班牙餐廳工作,看見瑞士籍的大廚「擺碟」功架神乎其技,即立誓要成為出色名廚,自此早上返工、晚上返學,學烹飪技巧,亦為未來開餐廳做老闆奠下基石。

 

入半島少林寺做學徒

飲食界享負盛名的「少林寺」是尖沙咀半島酒店,2004年底,朱學文有幸加入半島酒店,由學徒做起,日做18個鐘,甚至連用膳的時間都冇,「喺半島做咗6年,辛苦,但學到好多嘢,我走嗰陣嘅職位係部門主管下一級,負責中央廚房及宴會部。」

經過14年的鍛煉,朱學文尤其愛好西餐烹調,兩年前,他開始創業,在中大Canteen有兩間西式餐廳,「一間係做西式快餐,另一間係賣咖啡三文治,開始嘅時候全部落手落腳做,做好咗啲出品喇,再搵到個我信任嘅人,我先交低畀啲伙記做。」

 

特色漢堡包店人人讚

一直希望擴充生意的朱學文,三個多月前與數名友人合資於紅磡民泰街開設西式漢堡包店Burger Factory,店面裝修是由朱學文任職室內設計的太太負責,「由於舖頭面積細,所以寧願擺多啲錢喺裝修方面,去吸引多啲客人。」結果,不負眾望,以外賣為主、僅可提供4個戶外堂食座位的漢堡包店每天客似雲來,甚至有外籍熟客每天到臨打躉交談,「生意係比預期好少少,可能因為黃埔港鐵站的效應,而且我哋走嘅路線比較特別,不過未到夏天,到時可能會有少少影響。」

 

近至餡料遠至外賣盒都講究

朱學文的漢堡包店提供6款漢堡包,各有特色,「每一款包都有自己本身嘅特色,除咗舊肉唔同之外,肉裏面嘅配菜都有唔同,有啲配芝士煙肉,有啲配蛋沙律;甚至個麵包,我都搵咗十幾個供應商先揀到,同普通坊間嘅漢堡包係完全唔同,所以客人話個麵包係有驚喜嘅,只要咬一啖,未咬到個餡,已經話好好食喇!」

食品質素高人一等之外,就連外賣盒也十分講究,朱學文闡述:「個外賣盒特別在特別靚,有摺痕方便包裝成一個盒,盒上面亦有啲窿窿,擺咗個漢堡包入去之後,就拮支籤固定位置,仲可以疏氣,唔會令漢堡包同薯條變淋。最方便係,客人拎到返去,攤番開個盒當枱布,就可以即刻食,一舉幾得。」

 

客人有讚冇彈最有滿足感

成為老闆兩年,朱學文最高興是看到客人津津有味地品嘗由他炮製的美食,再奉上鼓勵稱讚的說話,當中的滿足感絕非打工仔能感受到,「做咗老闆,會收到客人即時嘅反應,簡單一句『加油』已經令我好開心。未來希望可以開多幾間唔同類型嘅餐廳,我自己當然想試多啲唔同嘅嘢,我想將我識嘅招數使晒出嚟,例如開Home made嘅意粉店,不過都要睇吓資金同埋舖位,唔可以話想做就做到,呢個世界好現實。」

相關新聞

熱門新聞