堅聞

2017-01-27


(堅訊)每個人都有夢想,Kellyjackie渴望成為歌手的夢想在17歲時已經達成,但快人一步唔一定就能理想達到;因為合約糾紛,令放棄學業的Kellyjackie驟變雙失,抑鬱成病,每日匿喺房自閉狂喊,「屋企人好擔心我,尤其是媽咪同婆婆,擔心到我喊,我知道我唔可以再咁落去喇。」

走出抑鬱低谷,今日的Kellyjackie成為了《警訊》的主持、微電影中的演員;不變的是,她那首熱播12年的《他約我去迪士尼》仍是首本名曲,「好多人話歌手都想一曲走天涯,我冇諗咁多,係咪一曲定係再創高峰寫多首,我只係希望默默耕耘,將自己嘅聲音發揮得最好、將自己寫嘅歌去到最好,令支持我嘅人唔好失望!」


擅彈鋼琴的Kellyjackie,在中五會考期間忽然彈出《他約我去迪士尼》整首旋律,經朋友編曲後,本想作為送給婆婆的母親節禮物,卻無心插柳成為網絡紅人、年度Hit歌,更讓她達成兒時夢想,加入樂壇。


合約糾紛變雙失

極速由網絡跳入樂壇的Kellyjackie,轉瞬跟一位在網絡認識的音樂朋友簽約,為專注音樂,Kellyjackie更放棄學業,及後卻因一些合約問題,竟令她一度銷聲匿跡。「嗰段時間對於一個啱啱放榜冇耐嘅女仔嚟講其實係一個幾大嘅震撼,又唔可以話係低潮,因為咁,我冇得再好似以前咁自由地去唔同嘅商場唱歌,而咁啱開始興起網絡電台,有人搵我主持節目;雖然我係歌手,但我又有另外一啲嘅體驗,訓練到自己做得不足嘅地方,亦真係有人留意到喎,所以慢慢就有啲其他嘅工作機會,好似邀請我拍一啲短劇,甚至乎客席做《警訊》嘅主持,跟住到後來就真真正正成為咗《警訊》嘅主持。」


抑鬱靠摯親扶持

本來夢想成真,瞬間卻因合約糾紛被打落谷底,其時的Kellyjackie,每朝起床望向窗口,感覺天色灰沉,眼淚便不自覺流下;每天自困房間,不梳洗、不刷牙、不見人,「一時狂食嘢,食極都好似落咗黑洞咁,一時又唔食嘢,瘦得好快。對屋企人態度超級差,自己鬧完又會唔開心,跟住又喊。」

沒有工作、沒有心情,Kellyjackie慶幸還有放不下的婆婆。「一次我去探婆婆,佢因為擔心我擔心到喊,我覺得要個年紀咁大嘅長輩去擔心自己係好不孝,我知我唔可以再咁落去。」

談及排首位的家庭及血濃於水的親人,Kellyjackie淚如雨下,更憶述起當年兩母女抱頭痛哭的情景,「記得嗰時屋企收到律師信,媽咪有睇過但冇問我,仲叫我早啲瞓,唔好諗咁多;轉頭我喺房行出廳斟水飲,竟然見到佢攞住好多頁紙嘅律師信同字典逐隻字查,佢唔想我擔心,但我反而成日令佢擔心。」


低潮期遇三貴人

家人的扶持、歌迷的支持,固然是Kellyjackie走出抑鬱陰霾的主因,但圈中三位貴人亦是將她由低谷帶回地面的拯救者。「喺一次慈善音樂會遇見米雪姐姐,當時我喺台度表演《越唱越強》,但唱到一半已經喊到收唔到聲;返入後台之後,米雪姐姐主動行埋嚟同我傾偈,跟住知道我有一啲合約嘅問題,佢就介紹咗個律師朋友畀我,其後有好多唔同嘅活動,佢都有邀請我一齊出去識吓人。」

「跟住又識到劉以達,又係喺慈善音樂會度佢見到我喊,佢畀咗機會我去幫佢啲歌填國語詞。另外,因為出一啲Band Show要去Band房練習,因而認識到Beyond嘅世榮哥哥,佢知我嘅背景,知我好鍾意唱歌,有時有啲Demo又會搵我去唱,一嚟可以滿足我自己喺錄音室錄歌嗰種自High,另一方面其實我係抒發緊自己嘅負能量。」


藉創作幫助他人

Kellyjackie的《他約我去迪士尼》已是12年前的歌曲,但至今仍是其表演的主打歌,「好多人話作為歌手都希望可以一曲走天涯,我冇諗咁多,係咪一曲定係再創高峰寫多首,但係我只係希望默默耕耘,我默默去寫,將自己最好嗰一樣嘢去呈現畀大家,將自己嘅聲音發揮得最好,令到支持我嘅人唔好失望。」

聽著八十年代鄭國江、黃霑等作品成長的Kellyjackie,認同填詞人把果子種入聽眾的內心,多得他們,Kellyjackie才能走過高山低谷,「上天畀個機會我識寫歌、識得填詞,我都好希望自己可以播吓種,哪怕呢粒種子將來開唔到花結唔到果,但係當有人揸揸吓車聽到首歌,一個緣份同佢接通咗,而改變到佢唔做傻事,或者令到佢求婚成功,咁我覺得首歌就好似佢哋生活中一個朋友咁,我希望我嘅音樂可以係一個少少嘅祝福帶畀大家!」


Accessoriesand WardrobeNoveltylane.com

相關新聞

熱門新聞